صلاح جاهين

إنشـد يـا قلبـي غنــوتك للجـمـال
وارقص في صـدري من اليمين للشـمال
مـا هـوش بعيـد تفضـل لبكره سـعيد
ده كـل يـوم فيـه ألف ألف احتمـال


عـجبي !!
آه لـو أنا ومحبـوبي


آه لـو أنا ومحبـوبي جـزنا الفضـى
فـى سـفينة وحـدينا.. وأشـيا رضا
سـاعة صـفا تعجبنـا نرجـع لـهـا
والهـم قبـل ما ييجي… يبقى مضى
عـجبي !!
أهوى الهـوى


أهوى الهـوى وهمس الهوى في العيـون
وبسـمة المغـرم.. ودمـعـه الحنــون
وزلــزلات الحــب نهــد الصــبا
أكـون أنـا المــحبوب.. أو لا أكـون


عـجبي !!
أوصـيك يا إبنـي


أوصـيك يا إبنـي بالقمــروالزهـور
أوصـيلك بـليل القاهـرة المســحور
وإن جـيت في بالك.. إشـتري عقـد فل
لأي سـمرا.. وقبـري إوعـك تـزور


عـجبى !!
أوقـات


أوقـات أفـوق ويحــل عنـي غبـايا
وأشـعر كأني فـهمت كـل الخبـايـا
وافتـح شـفايفي عشــان أقـول الدرر
مـا أقـولش غير حبة غزل في الصبايا


عـجبي !!
إيـديا فـي جيوبـي


إيـديا فـي جيوبـي وقلبـي طـرب
سـارح في غربة بس مش مـغترب
وحـدي لكـن ونسـان وماشـي كده
وبـابتعد… ما أعرفش… أو باقترب


عـجبي !!
إيش تـطلبي يـانفسـي


إيش تـطلبي يـا نفسـي فـوق كـل ده
حظــك بيضــحك وانـتي متنكـدة
ردت قـالت لـي النفس : قـول للبشـر
مـا يبصـوليش بعيـون حـزينـة كـده


عـجبي !!
إيه اللي خدتـه


إيه اللي خدتـه من مرور السـنين
يا قلبـي الا دمـعتك والأنـيـن
بتئن وبتفــرح وترجــع تحــن
مـع إن مـش كل البشر فرحـانين


عـجبي !!
أيـوب رمـاه الـبـين


أيـوب رمـاه الـبـين بـكـل الــعلل
سـبع سـنين مـرضان وعـنـده شـلل
الصـبر طيـب.. صـبر أيـوب شـفـاه
بـس الأكـاده مـات بـفـعل الـمـلل

عـجبي !!